கோடைத் தாக்குதலில்
உதடுகள் உலர்ந்த
இலைகளை
வாரி யணைத்துக் கொண்டது
ஒரு ஆலமரம்.

பீறிட்ட ஞாபங்கள்
ஒன்று சேர
மெல்ல கிளைமேல்
படர்ந்தேன் ஒரு பாம்புபோல.

ஒரு கிளையினுள் நுழைந்த
அக்கணமே கண்டேன்.
அங்கே பல சிற்பங்கள்
செதுக்கப் பட்டுக் கொண்டிருந்தன.
சிறு வலியோடு தண்டனைகள்
நிறைவேற்றப்படுகின்றன.
முன்பொருநாள் எனக்கும்..

"நீ யார்?
உனக்கு என்ன வேண்டும்?"
அதே அதிகாரத் தோரணையில்
கேள்வி கேட்கப்பட்டது.
என் பதிலை எதிர்பாராது
உளியை கையில் எடுத்துக்கொண்டான்
என்னையும் செதுக்கிய சிற்பி.
நான் ஞாபகங்களுடன்
வெளியேறினேன்.

அன்று
அழுத விழிகளுடன்
அதே கிளையில் தண்டனை
நிறைவேற்றப்பட்டதால்தான்
இன்று
அழகிய சிற்பமாய்
ஆதவனாய் நான்....

சாபமிட்ட அதே நாக்கு
வாழ்த்தவும் தயங்குகிறது.
என் செவிக்கு
பலரின் சாபங்கள் கேட்டன.
வருங்காலத்தில் அதைப் பற்றி
வருத்தப்படப் போவதறியாமல்.

எண்ணிலடங்கா
எண்ணிக்கையில்
உன் மீதொரு நம்பிக்கை

எப்படிப்பட்ட சவாலையும்
எதிர்க்கும் திறனாக
உன்னிரு கைகளின்
எண்ணிக்கையில்
திறமை வைத்திருக்கிறாய்
ஆனால்
எதிர்த்தாடும் சவாலை
எதிர்கொள்ள இயலாமல்
நீ இழந்த இடத்தினால்
ஊடகங்களின் ஒரு மூலையில்
மரணம் ஏற்பட்டிருக்கும்

ஒருவகையில் நீ கொலையாளிதான்

உன் சோகம் சில வினாடிகள்
என் சோகம் உனது
அடுத்த எழுச்சி வரை!
பதறிய மனங்களுக்காக
பேட்டிகள் கொடுக்கத் தெரிகிறது
உனது களத்தில் நின்றாவது
ஒரு போட்டி கொடுக்கத் தெரிகிறதா?

வெறும் கைதட்டலோடு
இருந்திருந்தால்
'போய்த் தொலைது' என்று
விட்டிருப்பேன்.
எனக்குள் மீறி
இதயத்தில் அமர்ந்த பின்
உன்னைத் தூற்றுவது தவறா?

உன் எழுச்சிக்கு மீண்டும்
வேண்டுகிறேன்
உன் வளர்ச்சிக்கும்
என்னை அறியாமலேதான்..........

பின்னலாடைகளுக்கு
உயிர் கொடுக்கும் தேர்ந்தவள் நீ

வேகமாக இயங்கும் கரங்களினால்
காணக் கூடாதவைகளைக்
காணத் துடிக்கிறது
என் கருவாட்டுக் கண்கள்
உன் மேனியின் ஈர்ப்பும்
அதன் மேல் படர்ந்திருக்கும்
ஆடையின் விலகலும்
என் நெருப்புக்குத் தீனியாக
மாறிவிட்டிருந்தது,

என் கரங்களின் தீண்டலால்
எழுந்து வருவாய்
நமக்கென ஒதுக்கப்பட்ட நேரத்தில்.
பஞ்சுக் கொடோனுக்குள்
பிஞ்சு மனதாய் நுழைவாய்.
பணிக்காகத்தான் என்று நீயும்
எனக்காகத்தான் என்று நானும்
நினைத்திருப்போம்.

அலைகழிக்கப்பட்ட
காற்று அறியும், அங்கே
அரங்கேறக் கூடாதவைகள்
அரங்கேறியது என்று.
உன் முனகலுக்குப் பூட்டாக
வெட்டுபட்ட துணிகள் கிடக்கின்றன.
இல்லையேல் வெட்டுபடும் சம்பளபாக்கி.

ஒதுக்கப்பட்ட நேரம் முடிந்ததும்
ஏற்பட்ட சலசலப்பில்
ஒரு லோகத்தை விட்டு
கலைந்து எழுவோம்.
கலைந்துபோய் நீயும்
கலையாக நானும்.

எனது அடுத்த இலக்கெல்லாம்
ஆடைகளை ஏற்றுமதி செய்வதுவும்
கூலியாக ஆடைகளைக் கலைப்பதுவும்////

என்றாவது ஒருநாள்
உன் மனம் பதறினால்
வீதியில் நடந்து செல்.
'சிங்கர், கைமடி*
ஆள்தேவை' என்ற
அட்டை தொங்கவிடப்பட்டிருக்கும்
உன் மானம் போல...

* சிங்கர் - துணியைத் தைப்பவர்,
கைமடி - ஒரு ஆடையின் மேல்பாகமும் கைப்பாகமும் இணைத்துக் கொடுப்பவர்...

ஃப்ளக்ஸ் விளம்பர பேனர்கள்
தொங்கவிடப்பட்டிருந்தன
வண்ணக் காகிதங்கள்
வடிவாய் கத்தரிக்கப்பட்டு
அங்கங்கே ஒட்டவைக்கப்பட்டிருந்தன
இவற்றில் ஆறிலொரு பங்கு செலவில்
பலகையால் அலங்கார மேடைகள்
அடிக்கவைக்கப்பட்டிருந்தன
சறுக்கி விழாதிருக்க
சாமியானா டெண்ட் போர்வைகள்
விரித்துக் கிடந்தன.


நானொரு மூலையில்
காட்சிக்காக காத்துக்கொண்டிருந்தேன்
ஒலிப்பெருக்கியில் சொன்ன நேரத்தில்
பறந்து வந்தன அழகிய பறவைகள்.
கண்கள் மயக்கும் உடைகளில்...
வலிகளை அடக்கிய
முகச்சாயம் தெரிகிறது.
நடனத்துக்குண்டான அசைவுகளை
மேடையில் சொல்லிக்கொண்டன.
இளம் பிஞ்சுகள்


ஒலியில்லாமல் அசைகின்றன
நர்த்தனமாடும் இவர்களின்
உதடுகள்.
கூட்ட இரைச்சலைக்
கண்டும் கேளாது இருக்கின்றன
இவர்களின் செவிகள்.
சிறப்பு நடனம் தருவதொன்றே
குறிக்கோள் போலும்..


முன்னே
மின்னொளி புகுத்தப்பட்டது.
பொதுமக்களுக்காக
பாடல் ஒலிபரப்பப்பட்டது
முதலில்,
தமிழை கொலை செய்யும்
குத்துப்பாட்டுகள் பாடின,
இன்ன பாடல்
என்றறியாமல் ஆடுகின்றன
மிகச் சரியான நடன அசைவில்.
இவர்கள் வாழ்வது
அந்த கொலையில்தான் என்பது
தெரிகிறது தெளிவாக..

பாடல் முடிந்ததும்,

" விஜய் ரசிகர் நற்பணி மன்றம்
சார்பாக ரூபாய் ஐம்பது
நன்கொடையாக பெறப்பட்டது "

என்ற அறிவிப்புகள்

" நன்கொடை தாரீர்"

நடனக் குழுத் தலைவி.
பேசத்தெரிந்தவள்
அவளொருத்தி மட்டும்.

மனம் கேட்டது.

" நீ?"

" நானொரு கவிஞன் "

" அதனால்?"

விடையில்லை என்னிடம்

கைதட்டலில் திருப்தியின்றி
நடந்து வருகிறேன்...
ஒலிப்பெருக்கியில்
ஒரு பாடல்
ஒலித்துக்கொண்டிருந்தது
பிஞ்சுகளின் ஆடைகள்
மாறிவிட்டிருந்தன.

22.3.07

ரகசியக் கவிதை.

|

நான் ஒரு கவிஞை அல்ல.
பெற்றெடுத்து அதை
உலகத்தில் சிறப்பிக்க
ஆனால் கவிஞை ஆக்கப்படுவேன்
இருட்டில் நடக்கும் எண்ணங்களால்

என் நெஞ்சில் கருவொன்று
திணிக்க முயன்றான் ஒருவன்
எண்ணங்களை உடைத்து
துளிகளின் மேலமர்ந்து
கசங்கிய நிலையில்
விதைத்துப் போனான்
ஒரு கவிதை மட்டுமே விளையும் கருவை.

ஆள் அரவமின்றி காய்ந்து கிடக்கும்
ஒரு தாளில் அழுத்தமாய்
புள்ளியிட்டு சென்றுவிட்டான்.
என் கரங்களில் வலிமை இல்லை
வலி ஏற்பட்ட நேரத்தில்
என் கரங்களும் என்னிடமில்லை

என்னை அறியாமல்
திணிக்கப்பட்ட எண்ணக்கருவால்
ஊற்றெடுத்தது கவிதை ஒன்று
ஆம் ஒன்றாகத்தான் இருக்கவேண்டும்.
கரு என்ன என்பது அறியேன்
ஆனால் கவிதை நிச்சயம்.

யாவருக்கும் ஏற்பட்ட
அதே காலத்தில்
கவிதை பெற்றெடுத்தேன்
என் கூரைக்குக் கீழே
ஒழுகும் தண்ணீரில்
கவிதை கரைந்துவிடக்கூடும்
ஆக அது வைக்கப்பட வேண்டிய
இடத்திற்கு வைக்கப்படவேண்டும்

திணித்தவன் எங்கோ ஒரு இடத்தில்
பிரச்சாரம் செய்து கொண்டிருக்கக்கூடும்
கவிஞை ஆக்கப்பட்டவளாகிய நான்
இதை என்ன செய்ய என்று அறியாமல்...

கண்களில் பட்டது....
தவறுகளையும், கழிப்பவைகளையும்
மகிழ்ச்சியோடு ஏற்றுக்கொள்ளும் களம்.
என் கவிதையை ஏற்றுக் கொள்ளுமா?
இருக்கட்டும்.
ரகசியக் கவிதையான இது
அங்கேயே வைக்கப்படும்.
இழந்த சோகத்தையும்விட
என் நெஞ்சிரண்டும் வலித்தது
கவிதையை வளர்த்திவிட

என் ரகசியக் கவிதை
எனக்குத் திணிக்கப்பட்ட கவிதை
என்னை வலிக்கச் செய்த கவிதை
வேறொரு பெயரிலாவது
புகழ் பெறட்டும்...
என்னோடு இருந்து
மழையின் துளிகளுக்கும்
வெயிலின் தாக்கத்திற்கும்
தாள் கிழிந்து போக வேண்டாம்.

நானும் ஓவியாவும்.

கோளத்தின் அலையாய்
முகம் தெரியும் மழைக் காலத்தில்
நடைபாதை கழிவுகளை
ஒதுக்கிவிட்டு
நனைக்காமல் இருக்க
குடையோடு தவழ்ந்துகொண்டிருந்தேன்

கண்கள் கண்டவரை
யாவரும் குடையுடன்
தலை காக்கின்றனர்
மழையின் அழுகையை
கண்களிலிருந்து வீசிவிடுகின்றனர்

ஒரு சிறு இடைவெளியில்
தள்ளுவண்டியுடன்
நிற்கும் அந்த தாத்தாவைக் கண்டதும்
மழைக்குக் கூட
இரக்கமின்றி போனது.
என் கைகள்
குடை பொத்தானைத் தழுவுகிறது.

எடுத்துச் சென்று கொடுக்க
யாவருக்கும் மனமில்லை
ஒரு முதியவரைக் காக்க
மழைக்கும் துணிவில்லை
விதிவிலக்காக நான்.

மழையின் ஆக்ரோசத்தை
மனம் தழுவிய அதேவேளையில்
உடல் நனைந்தது.
பிந்தைய நாளில்
என் மொழிகள்
வேறானது.

பகல் பொழுதுகளில்
இரக்கமற்ற அதே இடத்தில்
நடக்கையில்
தாத்தாவின் அருகே என் குடை
நிழற்குடையாய்.

நிறம் மாறும் மனிதர்கள்
குணம் கரையும் மழை
தாத்தாவின் பார்வை மட்டும்
நிதர்சனமாய் நிற்கிறது.

நன்றி ஓவி.. கவிதைக்கருவிற்க்கு..

சாலையோரங்களில்
நிதானியாக பயணிக்கையில்
உலாவும் கண்களை
கனவுகளாய் படரவிடுகிறோம்

பல்துலக்காமல் அவன் சிரிக்கும்
சிரிப்புக்கு வெறுப்பைக் காட்டி
இழந்து போன கால்களை
ஏளனமாய் பார்க்கிறோம்
அவன் கேட்கும் நாலணா
நம் சட்டைப் பையில் இல்லை..

தள்ளாட்டங்களுக்குக்
குறைவில்லாமல்
கண்கள் உருள நடந்து வரும்
மிதவாதியை
வேதனையாகப் பார்க்கிறோம்
இரவு கொண்டாட்டங்களுக்கு
எடுத்துவைக்கப்பட்டிருக்கும்
காசையும் கணக்கு
பார்த்துக் கொள்கிறோம்
மிதவாதியின் முகத்தைப் பார்த்து.

மெல்ல இறங்கி
கண்களின் பயணத்தில்
வீடின்றி தவிக்கும்
கூட்டத்தைப் பார்க்கிறோம்
வீணாக இரைக்கும்
பணம், கண்ணுக்குத் தெரிவதில்லை..

(இன்னும் இன்னும் இன்னும்
ஒராயிரம் பூக்களை
ஒரு மலர்கொத்தில் அடுக்க முடியுமா?)

எல்லாம் கவனித்துவிட்டு
வீட்டுக் கண்ணாடியில்
முகம் பார்க்கிறோம்
பிம்பத்தின் விரிசல்களில்
பல முகங்கள் தெரிகின்றன...

காதலாய் வருடிய
உன் அதே கைகள்
காற்றைக் கிழித்துக்கொண்டு
இடுகிறது
மூன்று கோடுகள்.

என் கேசத்தின் சுருளில்
மயங்கி விழுந்த காலம் போய்
இன்று சுருட்டி எடுக்கிறாய்
துவைக்கும் துணியைப் போல.
உதிரும் பூக்களின் அழுகையைக்
காணாமல் மிதிக்கிறாய்
வாசனை போக..

தெம்பில்லாத உயிராய்
உன் முன்னே நிற்கையிலே
ஆண்மையை நிலை நாட்டுவாய்
செந்நிறக் கண்களோடு.
ஒளியின் வேகத்தை மிஞ்சும்
ஒலிபடைத்த மனதோடு...

எதிரே கனவில் மிதக்கும்
இவளுக்குத் தெரியப்போகிறது
என் துளிகளின் அவமானமும்
உன் வெறியின் அட்டகாசமும்.
மெல்ல கனவைக் கொன்று எழுந்து
உன்னையும் என்னையும் பார்க்கிறாள்.
அரைவிழிகள் திறக்க..

கேசத்தைச் சுருட்டிய நிலையில்
உன் கைகளையும்
கண்களை உருட்டிய நிலையில்
என் கைகளையும் காணும்போது
என்ன செய்வாள்
நம் இன்பத்திற்கு பிறந்தவள்?

உன் கீறல்களுக்குச் சுவராய்
இருந்தது என்னோடு போகட்டும்
இப்பிஞ்சுக்குத் தெரிய வைக்காதே!

யாகங்கள் செய்த பின்னும்
அதன் புகை உனைத் தொட்ட பின்னும்
மேகங்கள் கருத்த பின்னும்
எம் நெஞ்சங்கள் வெளுத்த பின்னும்
மோகங்கள் தீண்டிய பின்னும்
சூரியனைக் கழித்த பின்னும்
தாகங்கள் அடங்கவில்லை - மழை
சோகங்கள் தீரவில்லை

பாகங்கள் உனக்கிரைத்தோம்
பழி பாவங்கள் விட்டிரைத்தோம்
கோபங்கள் எடுத் தெறிந்தோம்
கோவில்கள் எடுத் திரைத்தோம் - சிலர்
நாமங்கள் பழித்த காரணமோ?
ஓமங்கள் இழித்த காரணமோ?
தீமைகள் தடுத்திரா காரணமோ?
ஊமைகள் ஆன காரணமோ?
சீமைக்குக் கொடுத்த மழை-இந்த
ஊமைக்கு கொடுத்தல் உமக் கிழிவோ?
ஊமைக்கு உரைத்த லில்லையென
எமைக் கண்டு இளிப்போ?

ஆதி எடுத்துரைத்து பாடலியற்றி
மீதி உயிரெடுத்து மிச்ச மேகத்தில்
மெச்ச உதரிவிட்டு, கண்கள்
உச்ச வான் நோக்கும்....
இரத்தம் சிதறிவிட்டோம்
மொத்தம் உமக்களித்தோம் -ஆதலின்
ஆசு கவி போலிங்கு
பூசு மழை பூமிக்கு - இந்தப்
பாட்டுத் தீ பட்ட பின்னாவது -எங்கள்
காட்டுத் தீ அணைப்பாயோ?
காக்கின்றோம் உமது பதிலுக்கு - எதிர்
பார்க்கின்றோம் உமது துளிகளுக்கு...

விரிக்கப்பட்ட ஒரு துண்டின் மேல்
விழும் எச்சில்களுக்கு
இரத்தம் வருத்த ஆடுகிறான்
தன் பிஞ்சுகளோடு

கனத்த உடலும்
கால் தெரியும் அமைப்பும்
ரசிக்கத்தான் கூட்டமுண்டு
காலணா வீச ஆளில்லை

கரணம் அடிக்கும் பூக்களை
ரசிக்கத் தெரிகிறது
சிந்தும் துளி ரத்தங்கள்
கண்ணுக்குத் தெரிவதில்லை

உழைக்கப் பல தொழில்கள்
பிழைக்கப் பல தொழில்கள்
பிச்சைக்குத் தொழிலுண்டா?
வீசுங்கள் உங்கள் சட்டைப்பை
காசுகளை.

ஆகாயத்தின் மத்தியில்
ஆடும் இவர்களின் வாழ்க்கையும்
அடிக்கடி கலையும் மேகங்கள்

கயிறின் நுனியில்
உயிரை வைத்து
பூக்கள் வாடும் மஞ்சள் வெயிலில்
உதடுகள் வெடிக்க
இவர்கள் ஆடுகிறார்கள்
இறைவனின் கூத்து
இறைவன் ஆடுகிறான்
இவர்களின் வாழ்க்கையில் கூத்து.

இது கொசுறு கவிதை:

(எல்லாவற்றையும்
கவிஞனுக்கு எழுதத் தெரிகிறது
எழுந்து போய் ஒரு வார்த்தை
சொல்ல தெம்பில்லை.)

முதலில் கணிணி எப்படி எனக்கு
அறிமுகம்?. எட்டு அல்லது ஒன்பதாம் வகுப்பு படிக்கும் போதுதான் கணிணியை கண்ணில் பார்த்தேன். எட்டாக் கனி.
தொடக்கூட அநுமதியில்லாமல் இருந்தது. DOS என்ற OS படித்த பின்தான் கணிணியைத் தொடவிட்டார்கள். பள்ளிக்கு
வெளியே மாதக் கட்டணத்தில் படித்த போது சில மொழிகளையும் (qbasic, foxpro) சேர்த்து படித்தேன். கணக்கு நமக்கு
சருக்கும் என்பதால் qbasic ல் தோற்றுவிட்டேன். வேலை நிமித்தமாக சென்னையில் உறவினர் வீட்டில் தங்கி
இருக்கும்போதுதான் Windows படித்தேன். நான் எடுத்தது PGDCA ( Post Graduate Diploma in Computer Application)
எல்லாம் சொல்லிக் கொடுத்தார்கள். ஆனால் நான் படித்தது இரண்டு மட்டும்தான். ஒன்று முழுமையாக Windows
(கிட்டத்தட்ட 95 சதம்) மற்றது இணையம்.
ஊரில் வேலைக்காக Corel படித்தேன் photoshop படிக்கவில்லை; தானாக தெரிந்துகொண்டேன்.

வேலைக்கு அமர்ந்த போதுதான் விளையாட்டுக்கள் பற்றி அறிந்து கொண்டேன். எனக்கு மிகச் சரியாக அறிமுகமாகிய
விளையாட்டு wolf. இது ஒரு ஆக்ஸன் விளையாட்டு என்றாலும் கிராஃபிக்ஸ் அவ்வளவாக நன்றாக இருக்காது. அப்போது
எனக்கு அதுவே பெரிதாகப் பட்டது. அந்த விளையாட்டை முழுவதுமாக முடித்துவிட்டேன். பிறகு கிடைத்தது Doom.

எனக்கு மிக ஆர்வமுண்டாக்கிய விளையாட்டில் இதுவே முதல். முழு கேமையும் முடிப்பதற்கு நான் வெகு காலங்கள்
எடுத்துக்கொண்டேன். DOS சார்ந்த கேம் என்றாலும் வெகு சிறப்பாக இருந்தது. அதன் பின் வேலையிருந்ததாலும்
பெரும்பாலும் டெமோ மட்டுமே கிடைத்ததாலும் அவ்வளவாக விளையாடாமல் இருந்தேன்.

வீட்டில் கணிணி வாங்கியதும் முதல் வேலையாக கேம் பதிவு செய்தேன். என் முதல் கேம் wolf, மற்றும் doom ஐ
திரும்பவும் விளையாடினேன். Roadrash என்ற மோட்டார்சைக்கிள் ஓட்டும் கேம் எனக்கு பிடித்தது.. தெரிந்த ஒருவரிடம்
முழுமையாக வாங்கி எல்லா Race ஐயும் முடித்துவிட்டேன்.. இருந்தாலும் எனக்கு திருப்தி சற்று குறைந்தே இருந்தது.

SOF II (Soldier of Fortune II ) :

என் வாழ்வில் மறக்க முடியாத விளையாட்டு.. First Person shootter வகையை சார்ந்தது. என் நண்பரின் உதவியில்
டூப்ளிகேட் தகட்டில் பதிந்த இதை வாங்கி விளையாடினால்.... சீக்கிரமே செத்துவிடுவேன் (கேமில்.. ) கொஞ்சகாலம்
எனக்கு அது பிடிக்கவே இல்லை. ஒருநாள் என் நண்பன் விஷ்ணு என்பவன் ஏதாவது கேம் விளையாடலாம் என்றான். சரி
என்று SOF II போட்டு விளையாடினோம். அவனும் சரி நானும் சரி இருவருமே கத்துக்குட்டிகள். இருந்தாலும் கொஞ்ச
கொஞ்சமாக விளையாடி அடுத்தடுத்த லெவலுக்கு முன்னேறினோம். இது ஆக்ஸன் கேம் என்றாலும் மூளை வேண்டும்.. சில
இடங்களில் மூளையின் பிரயோகம் அதிகம் தேவைப்படும். வைரஸ்களை தயாரிக்கும் கும்பல் உலகம் முழுவது
நிறைந்திருக்கும் அவர்களை அழிக்க கதாநாயகன் செல்லுவதே கதை.. கதைக் களம் எல்லா பருவநிலையிலும் எல்லா
திணைகளிலும் நடக்கும். எனக்கு மிகவும் மிகவும் பிடித்த விளையாட்டில் இதுவும் ஒன்று.

ஒரு ஆளாக விளையாடி முடிக்கவேண்டுமென்றால் ஒரு நாளைக்கு 7 மணிநேரம் வீதம் ஒரு வாரத்தில் முடித்துவிடலாம்.
நான் எடுத்துக்கொண்ட காலம் 6 மாதம்.. இந்த விளையாட்டில் சிறப்பம்சம் என்னவென்றால் நிறைய Mission கள்
துப்பாக்கிகள் அதைவிட புத்திசாலித்தனமான போக்கு, சிறப்பான கிராபிக்ஸ் என அனைத்து அருமையாக இருந்தது.
இந்த கேமிற்கு அடிமையாகிவிடுவேனோ என்ற அளவிற்கு விளையாடினேன் என்றால் பார்த்துக்கொள்ளுங்கள்..

SOF II முடிப்பதற்குள் Spiderman, NFS, Cricket போன்றவைகளும் முடித்துவிட்டேன். குறிப்பாக Spiderman மிக
எளிதாக இருந்தமையால் நான் அவ்வளவாக விளையாடவில்லை. விஷ்ணு அதை முடித்துவிட்டான். அதுவும்
சுவாரசியமான கேம்தான்...

SoF II முடித்து சில நாட்கள் சும்மாவே இருந்தேன். வேறு எந்த கேமும் கிடைக்கவில்லை. அச்சமயம் பார்த்து டிவியில்
COD என்ற விளம்பரம் பார்த்தேன்... ஏதோ சொல்லுவார்களே Love at First Sight என்று. அதேபோல் Addict at first
sight ஆகிவிட்டேன்..

COD (Call of Duty)

SoF II வை விட என் வாழ்வில் மறக்கமுடியாத கேம். இரண்டாம் உலகப் போரை மையமாகக் கொண்டு எடுக்கப்பட்டது..
எல்லா வகையிலும் SoF II வை விஞ்சும் விளையாட்டு. ஒரு போர்களத்தில் புகுந்துகொண்ட அனுபவமே இது தந்தது..
இது தனிநபராக இணைந்து போராடும் விளையாட்டாக அல்லாமல் ஒரு குழுவாக சென்று தாக்கவேண்டும்.. அதன்
நேர்த்தி இன்றும் என்னால் மறக்கமுடியாது. ஏகப்பட்ட Mission கள். அதிலும் பல நினைத்தாலே எனக்கு இன்றும்
மன்றத்தில் எழுதுவதை விட்டுவிட்டு கேம் ஆடலாமோ என்று தோன்றும். அத்துணை சிறப்பு இந்த கேமிற்கு. இந்த
கேமிற்காகவே யாருக்கும் தெரியாமல் 2500 ரூபாய் செலவு செய்து nVidia Card வாங்கினேன்.

நான் எதிர்பார்த்த திருப்தி எனக்கு இந்த கேம் மூலமாக மட்டுமே கிடைத்தது. துப்பாக்கிகளோடு கையெறி குண்டுகள்.
கால குண்டுகள் மற்றும் வண்டி ஓட்டிக்கொண்டே சுடுவது.. பீரங்கிகள் ஓட்டி குண்டு எய்வது.. வானில் பறக்கும்
விமானங்களை சுடும் சிறப்பு எந்திரங்களை சிறப்பாக கையாள்வது, தந்திரமாக எதிரியின் கட்டிடத்தில் கால குண்டு
வைப்பது என்று அனைத்தும் படு பிரமாதம்.. இடையிடையே SOF II போலவே படமாக ஓடும்.. SoF II கேமிற்கு
நிச்சயமாக ஆங்கில அறிவு தேவை. இதற்கு அவ்வாறில்லை.. சுமார் 4 மாதத்தில் முடித்துவிட்டேன். (இதுவரை
மூன்றுமுறை முடித்துவிட்டேன்...)

நிச்சயமாக பலரும் விளையாடக்கூடியது. வாய்ப்பு கிடைத்தால் Call of Duty விளையாடிப்பாருங்கள்

அதன்பிறகு Maxpayne, MIB, WWE, போன்றவைகள் வந்துபோனாலும் எனக்கு அவ்வளவு திருப்தி அளிக்கவில்லை.

DOOM 3 . நான் பெரும்பாலும் Activision கம்பனி கேம் களை மட்டுமே வாங்குவேன். அந்த கம்பனி மட்டுமே
யதார்த்தமாகவும் 3D கிராபிக்ஸ் அழகாகவும் கொடுக்கும் கம்பனி. அதன் அடுத்த தயாரிப்பாக Doom 3 வாங்கினேன்.

DOS ல் விளையாடிய அதே தான்.. இப்போது 3D முலாம் பூசி கொடுத்திருக்கிறார்கள்,. மிகவும் சிறப்பான 3D க்ராபிக்ஸ்
கொண்ட கேம்.. இதன் தேவைப்படி பாருங்கள் : 128 MB Video Ram, 512 MB RAM.

நீங்கள் இதயநோயாளியானால் தயவுசெய்து இந்த கேம் பார்க்கக்கூட வேண்டாம்.. அவ்வளவு கொடூரமானது.. அதைவிட
ஒலி........ சொல்லக்கூட முடியாது. திடீரென தாக்குதலுக்கு திடீர் ஒலி கொடுப்பார்கள்.. நான் பயத்தாலேயே இதன் Patch
Resurrection of Evil விளையாடவே இல்லை என்றால் பார்த்துக்கொள்ளுங்கள்.. மார்ஸ் கிரகத்தில் நடப்பதாக
விளையாட்டு செல்லும். (ராக் நடித்த டூம் படமும் இதைப் பார்த்து எடுத்த படம்தான்.) ஒவ்வொரு நொடியும் பயந்தவாறே
செல்லவேண்டும்.. பயந்துகொண்டே முடித்துவிட்டேன்.. ஆனால் முடிக்க ஒருவருடமே ஆகிவிட்டதுதான் கொடுமை..

இதில் Mission களுடன் PDA உபயோகமும் செய்யவேண்டும்.. அந்த யுக்தி எனக்கு மிகவும் பிடித்திருந்தது.. PDA
மூலமாக மெயில் பெற்றுக்கொள்ளலாம் அல்லது வாங்கிக்கொள்ளலாம். பேயால் தாக்குண்டு இறந்துபோன
விஞ்ஞானிகளிடமிருந்து ரகசிய வார்த்தைகள் அவர்களை பற்றிய குறிப்புகள் போன்றவைகளை பெற்றுக்கொள்ளலாம்.
கேம் நகருவதற்கு முக்கிய காரணியாக இது இருக்கிறது. துப்பாக்கிகள் விதவிதமாய்.... ஒவ்வொன்றும் மிக அருமை.

World of Warcraft III : குறிப்பிட்டு சொல்லக்கூடிய கேமில் இதுவும் ஒன்று.. முழுமையும் என் நண்பன் விஷ்னு
உதவியுடன் முடித்தேன். நான்கு பிரிவுகளாக சண்டையிடவேண்டும். இந்த வகை விளையாட்டு ( platform என்று
நினைக்கிறேன் ) பிடித்திருந்தது. இந்த கேமில் கேம் கிராபிக்ஸைவிட இடையிடையே வரும் Movie கிராபிக்ஸ் எந்த
ஒரு ஹாலிவுட் படத்திலும் பார்த்ததில்லை. வீடியோ இணைத்துள்ளேன் பாருங்கள் நேர்த்தியை..

Age of empires 3 வந்ததும் வாங்கியதுதான். விளையாடவே இல்லை. ஆர்வம் குறைந்துவிட்டது..

இதுவும் முடிந்த பிறகு பல கேம்கள் கிடப்பில் கிடக்கின்றன.. Brothers in Arms, Hulk, போன்றவைகளும் பட்டியலில்
அடக்கம்... Hulk முழுவதுமாக முடித்துவிட்டேன். பலவற்றிற்கு பெயர்கூட மறந்துபோய்விட்டது.. இதற்கு பின்
முழுமையாக விளையாடிய ஒரே கேம் COD II தான்..

COD II (Call of Duty 2) : பழைய கேம் போலத்தான். கிராபிக்ஸ் வித்தியாசம் இருக்கிறது. இது இன்னும் யதார்த்தம்.
பழைய கேமில் மருத்துவப் பெட்டி எடுத்துக்கொண்டால்தான் உயிரோடு கேம் முடிக்கமுடியும். இதில் அப்படியில்லை.
ஆசுவாசப்படுத்திக்கொண்டு பின் செல்லவேண்டும். நாட்டின் சார்ப்பாக விளையாடவேண்டும்.. பல அம்சங்கள் எனக்கு
பிடித்திருந்தன.. இருந்தாலும் முதல் கேம் போல இல்லை..

இப்போது கேம் விளையாடுவதில் ஆர்வம் குறைந்துவிட்டது. ஆனாலும் பட்டியல் இருக்கிறது

முக்கியமாக கவனிக்கவேண்டியது: பக்குவம் உள்ளவர்கள் மட்டுமே விளையாடவேண்டும்.. எந்த சூழ்நிலையிலும் Cheat
code உபயோகித்தல் கூடாது.. நான் டூம் 3 க்கும் மட்டுமே உபயோகித்தேன். அதுவும் கடைசி கிளைமாக்ஸில்.

முதன்முதலாய்
உன்னருகே நான்.
உன் போதை விழிகள்
என் உடலில் எழுதின
எனக்கான தலைவிதி.

உன் மனமெப்படியோ
அப்படியே செல்ல
என் வாழ்க்கை
பயணிக்கும் போது
இடையிடையே
இரவுத் தீண்டல்களில்
பாதை தடுமாறும்.

உனக்காக பட்டினி
கிடந்தேன் பல நாட்கள்
மனநிறைவாய் வருவாய்.
எனக்கென இருநாட்கள்கூட
உன் மனம் தாங்காது

சலித்துப் போய்
நடுநிசியில்
யாருமில்லாத வானத்தை
வெறுப்பாக பார்ப்பதும்
கொண்டாட்டமில்லா இரவுகளை
அடியோடு தொலைப்பதும்
இன்றைய சூழ்நிலையாக்கினாய்.

உன் விஷமம் அறிந்தும்
உன்னுயிரோடு ஒட்டுகிறேன்
பிளாஸ்டிக் பை நீராக...
நீ என்னோடு எழுதிய கவிதைகள்
என் அருகே உறங்குகின்றனவே!

வீட்டை காலி செய்து மனதை கொன்றான்..
அவளோடு அலைந்து திரிந்த கானகங்கள்
பூங்காக்கள், சாலைகள் ஆகிய
எல்லா இடங்களிலும் சோகமாய்
ஒரு பிரிவை உணர்ந்தான்..
அங்கே அவளோ
ஏதோ மறந்த உணர்வோடு
மகிழ்ச்சியாக இருந்தாள்..
அக்காள் குழந்தைகளோடு
விளையாடிக்கொண்டும்,
வீட்டில் அக்காளுடன் சண்டைபோட்டும்
மாமாவைக் கொஞ்சிக்கொண்டும்
மருத்துவத் தொழிலைத் தொடர்ந்தும்..
சாதாரணமாகத்தான் இருந்தாள்..
ஆனால் ஏதோ ஒன்று இழந்த நினைவு.
என்ன என்றுதான் தெரியவில்லை..
அன்றைய ஒரு நாள்..
அவள் வீட்டிற்குச் சென்றான்
அங்கே நினைவுகளைப் படரவிட்டான்..
அவளோடு சண்டையிட்ட இடங்கள்,
கொஞ்சிய இடங்கள்
ஒவ்வொன்றாக கணக்கிட்டான்...
சோகம் மட்டுமே மிஞ்சியது...
அவள் ஆவியாகவே இருந்திருக்கலாம்..
மென் குணம்படைத்தவள்
இன்று இதயத்தைத் தைக்கிறாளே!!
அக்காள் வீட்டிலிருந்து
தன் வீட்டிற்கு வந்தாள் பூங்குழலி.
தன் வீடு சற்றே மாறி இருப்பதை
சந்தேகத்தோடு உணர்ந்தாள்.
ஆவியாக இருந்த காலத்தில்
நடந்த அத்துணைகளும்
நொடியில் மறந்துவிட்டாள்...
ஏதோ மாற்றம் நிகழ்ந்துள்ளது என்று
நினைத்தாளே தவிர,
அது தானிருக்கும்போதுதான் என்று
நினைப்பு வரவில்லை,,,,
இல்ல மாற்றத்தை நோட்டமிட்டே
மெல்ல மாடி ஏறி வந்தாள்..
அங்கே........
கதிரவன் மாடியை
ஒரு பூங்காவாக மாற்றியிருந்தான்..
பூத்துக்குலுங்கும் செண்பகப்பூவும்
கனகம், ரோஜா, செவ்வந்தி ஆகியவையும்
அழகூட்டப்பட்ட தூண்களில்
படர்ந்திருக்கும் முல்லைகளும்
கொடிகளும்
மாடியை வர்ணமயமாக்கின...
அதைப் பார்த்த அவள்
சொக்கிப் போனாள்...
பூக்களுக்கு தண்ணீர் ஊற்றும்
கதிரவனைக் கண்டதும் வணங்கினாள்.
அவனால்தானே இன்று
பூக்களை ரசிக்க முடிகிறது!!
கதிரவன் சோகத்தை மறைத்தான்
ஆதவனை மறைத்து நிற்கும் மேகமாய்..
விளிம்பில் நீர் எட்டிப் பார்த்தாலும்
முகத்திலே சிரிப்பைக் கொண்டு
அவளை அணுகினான்..
பூங்குழலிக்கு ஏதோ
இழந்த மாற்றம்///
அது அவன் கண்களைப் பார்த்ததும் வந்தது..
கதிரவன் விடைபெற முயன்றான்..
காதலி முன்னே நின்றும்-அதிலும்
உடலோடு இணைந்த உயிராக நின்றும்
வேதனை மிஞ்சப் புறப்பட்டான்...
காதல் வெறும் பஞ்சல்ல.
அவள் இல்லத்து சாவியைக் கேட்டாள்.
அவன் மறந்தாற்போல எடுத்துச் சென்றுவிட்டால்??
சாவிக்கொத்தை குழலியின் கைகளில்
திணித்தான் மெல்ல....
அற்புதங்கள் வாழ்க்கையின்
சில நேரங்களில் நிகழும்...
அதோ!!
அவன் ஸ்பரிசம் பட்டதும்
உயிர் விளையாடிய சித்து விளையாட்டுக்கள்
நினைவுக்கு வந்தன.
அவள் இழந்த உணர்வு இவன்தான்.
ஆம்,,
காதல் என்றும் அழியாது.
உணர்ச்சிகள் மேலிட
கட்டி யணைத்தான் கதிரவன்..
பூமித்தாயை அணைக்கும் ஆதவன் போல..
காதலுக்கு முகமில்லை
மோட்சமில்லை
அகமில்லை.
அது ஒரு வெற்றிடம்
காற்று புக முடியாது//
குழந்தைகள் போல
இரண்டு மனங்களின் பிணைப்பே காதல்..
கதிரவனும் பூங்குழலியும் இனி
நிஜக் காதலர்கள்...
ஆவி உலகை வென்ற காதலர்கள்.
காதல் ஒரு மாயை..
உள் நுழைந்து ஆட்டி படைக்கும் தெய்வீகம்..

வாழ்க காதல்
வளர்க தமிழ்...


"விஷாக்! இன்னிக்கு நமக்கு டைவர்ஸ். கோர்ட்டுக்கு வந்துடு. ஏதாவது காரணம் சொல்லாத. "

"ம்ம்ம்.. கண்டிப்பா! உன்னோட லட்சியத்துக்கு என்னைக்கும் தடையா இருக்க மாட்டேன்."

போனைத் துண்டித்துவிட்டான் விஷாக்.

இன்று இருவருக்கு விவாகரத்து ஆகப் போகும் தினம்.. மகளிர் தினமும் கூட. கிட்டத்தட்ட இரு வருடங்கள் பிரிந்து
வாழ்கிறார்கள். பிரிந்து வாழ்ந்தாலும் நண்பர்களாக தொடருகிறார்கள். சில சொல்லப்படாத கருத்துக்களுக்கு பிரிந்து
வாழ்கிறார்கள் என்றால் அது இக்காலத்தில் ஆச்சரியமல்ல.

விஷாக் ஒரு கிறிஸ்டியன். இன்ஃபோசிஸ் இல் வேலை செய்யும் மென்பொருள் வல்லுனன். தொழிலுக்கு ஏற்ற மென்மை
கலந்தவன்/ ஜார்ஜ் வெலிங்டன் என்ற உண்மையான பெயரை தன் காதலி லட்சுமிக்காக மாற்றிக்கொண்டான்.
இருப்பினும் அவன் பெயரில் ஒரு கிறிஸ்துவ நெடி அடிக்கும்./
லட்சுமி ஐயர் வீட்டுப் பெண். காதல் திருமணமே சிறந்தது என்று விஷாக்கை மணந்தவள். பெற்றவர்களின் எதிர்ப்பை மீறி
மதுரையில் ஒரு சர்சில் நடந்த திருமணம். சென்னையில் வேலை கிடைத்துவிட்டதால் அங்கு சென்று குடும்பம்
தள்ளினார்கள்.

சென்னையில் இருந்தபோதுதான் பிரச்சனையே ஆரம்பம். ஓயாமல் வேலை வேலை என்று சுற்றிக்கொண்டு
இருந்தமையாலும் சகஜமாக பழகும் பெண்களை லட்சுமி விரும்பாததாலும் சற்று இடைவெளி அதிகமானது இருவரும்
உறங்கும் அறையில். காதல் இருவருக்கும் உண்டு. காட்டிக் கொள்ளத்தான் மறுக்கிறார்கள்.

கோர்ட் வீதியில் காரை நிறுத்தி இறங்கினான் விஷாக். கார் ஓட்டுனர் அதனை நிறுத்த வேண்டிய இடத்தில் நிறுத்திவிட்டு
ஹாயாக அமர்ந்திருக்கையில் ஒரு டாக்ஸியில் வந்து இறங்கினாள் லட்சுமி.

"லட்சு! பிளீஸ் இன்னிக்கும் ஒன்னும் கெட்டுப் போகல. நல்லா யோசிச்சுப் பாரு. என்ன தப்பு பண்ணினேன்னு விவாகரத்து
வரைக்கும் போயிட்ட?"

"பிளீஸ் லிசன் விஷு! நாம ஃப்ரெண்டாவே இருப்போம். பழைய புராணத்தைப் புரட்டாத. உனக்கு எத்தனை தடவை
சொல்லி இருக்கேன். இந்த மாதிரி திரும்பத் திரும்பக் கேட்காதேன்னு.

"சாரி லட்சு! ஒவ்வொருதடவையும் இதை சொல்லும்போது நீ திரும்பி எனக்கு கிடைக்கமாட்டாயா ன்னு ஒரு ஆசை..
இந்த ரெண்டு வருசத்தில நாம அழுததுதான் மிச்சம்,. "

"யுவா என்ன பண்றான்?"

"அவனுக்கென்ன ஸ்கூலுக்கு போயிட்டு வருவான். நான் அவனை கண்டுக்கறதே இல்ல." ஒரு தாய் பாத்துகற மாதிரி
வருமா?"

" ம்ம் சரிசரி.. நம்ம கேஸ் வரதுக்கு இன்னும் ரெண்டு மணிநேரமாகும். வக்கீல்ட இப்பத்தான் பேசினேன். கன்பாஃர்மா
இன்னிக்கு டைவர்ஸ் வாங்கி கொடுத்துருவாரு.. "

" லட்சு! கடைசியா சொல்றேன். எல்லாத்துக்கும் யோசனை பண்ணு! "

லட்சுமி முறைத்தாள் அவனைப் பார்த்து. அவளுக்கும் ஏக்கம்தான். முதன்முதலில் விவாகரத்து நோட்டீஸ் விட்டது
இவள்தான் என்றாலும் அந்த காரணத்திற்காகவே பலநாட்கள் அழுதிருக்கிறாள். அதோடு பையன் யுவாவை பிரிந்த
சோகமும் கூட..
யுவா அப்பா செல்லம். அதனாலேயே அப்பாவிடம் இருந்துவிட்டான். இருந்தாலும் அவனுக்குள்ளும் பாசம் எட்டும்போது
அன்னையை அவ்வப்போது பார்ப்பான்.

"என்னங்க லட்சுமி மேடம்! இன்னிக்கு குளோஸ் பண்ணிடலாமே!" வக்கீல் தாமோதரன் இடைச்செருகலாக வந்தார்.

" சார்! இன்னிக்கு முடிச்சுடுங்க." லட்சுமி

" என்ன சார்! நீங்க பதில் சொல்ல மாட்டேங்குரீங்க? ரெண்டு பேரும் நோட்டீஸ் அனுப்பி கண்டபடி பேசிக்குவீங்கன்னு
எதிர்பார்த்தா இப்படி அன்யோன்யமாக இருக்கீங்களே!? திரும்பவும் யோசியுங்க மேடம்..."

" தாமோதரன் சார்! ரெண்டு வருஷமா யோசிக்காத ஒன்னை ரெண்டு மணிநேரத்தில யோசிச்சு பிரயோசனமில்லை.. லட்சு
திரும்பவும் எனக்கு கிடைப்பாள்னு நெனச்சேன். ஆனா ..."

"தோ பாருங்க விஷு... ரிலேக்ஸ். எல்லாம் நல்லதுக்கே!

மண் கறைகள் படிந்த அந்த கோர்ட் வளாகத்தில் அவர்கள் பெயர் அழைத்ததும் சென்றனர் இருவரும்.. கூட வக்கீலும்.
நம் எண்ணங்களிலிருந்து எத்தனை தூரம் தள்ளிப் போகிறோம்? பெண்ணின் மனது வலியதுதான். இருந்தாலும் எல்லா
விஷயங்களிலும் இருந்தால் என்னாவது? ஒதுக்கும்போது வலிக்கும் இதயத்தை எடுத்து அழுதிட இருவருக்கும்
துணிவில்லை.. ஆனால் பாழாய் போன மனம் மட்டும் லட்சுமிக்கு திரும்பவும் சேர மறுக்கிறது.

" விஷாக்! நீங்க உங்களோட மனைவியை விட்டு பிரிய விருப்பப்படுறீங்களா? உங்கள் முழு மனசு இதுக்கு ஒத்துக்குதா? "
நீதிபதி கனம் நிறைந்த குரலில் கேட்டார்.

" யெஸ்! " ஒரே வார்த்தையில் கண்களில் வெளிவந்த நீரை மறைத்து சொன்னான்.

" லட்சுமி! நீங்க?"

" முழுமனசோட சம்மதிக்கிறேன்.. எனக்கும் சரி அவருக்கும் சரி சேர்ந்துவாழ இஷ்டமில்லை.. "

" இருவரின் முழுமனதின் படியும், சுய நினைவோடும் இருவருக்கும் உண்டான பந்தத்தை இந்த நீதிமன்றம் பிரிக்கிறது.
சட்டப்படி இனி இருவரும் தனி மனிதர்கள். இவர்களின் குழந்தை யுவா அவர் தாயின் அரவணைப்பில் 18 வயதுவரையில்
வளர்க்கப் படும் என்றும் கூறி உத்தரவிடுகிறது."

மெல்ல வளாகத்தை விட்டு இருவரும் நீங்குகையில் இருவருக்கும் மனது காணாமல் போயிருந்தது. காதலை விட
பிரிதலில்தான் வலி அதிகம்./ அவளுடைய தொண்டை அடைபட்டுக் கிடந்தது. அவனுக்கு இதயமே நின்று போய்க்
கிடந்தது.

காரில் ஏறுகையில் அவளை அழைத்தான்.

"லட்சு! கங்க்ராட்ஸ்! நீ நெனச்சதை சாதிச்சுட்ட.. எப்படியும் பிரிஞ்சுடுவோம்னு தெரிஞ்சும் உனக்காக மகளிர்
தினத்துக்காக ஒரு ரோஸ் வாங்கிட்டு வந்தேன்.. பிளீஸ் வாங்கிக்கோ!"

அவள் மெளனமாக நின்று கொண்டிருந்தாள். அவன் ரோஸ்கள் அடங்கிய ஒரு பொக்கேயை எடுத்துக் கொடுத்தான்.
கண்ணிர் சிந்த அவள் பெற்றுக்கொண்டாள்.

" பை லட்சு! என்னை காண்டாக்ட் பண்ணு அடிக்கடி. நீ பேசற அந்த வார்த்தைகளுக்காகவே நான் உசுரோட
இருப்பேன். யுவா வை உன்னோட வீட்ல கொண்டு வந்து நைட் விட்டுடுவேன். பை மா! "

இதயங்களின் அழுகை மனதுக்குத் தெரியாமல் போய்விட்டது. இருவரின் மனரத்தினால் இதயங்கள்
உருகிக்கொண்டுதான் இருக்கிறது. லட்சுமி ஒரு ஆட்டோ பிடித்து வீட்டுக்கு வந்து சேர்ந்தாள். அவளால் அடக்க
முடியாத அழுகை அப்போது பீறிட்டு, தன் அறைக்குள் சத்தமாகவே அழுதாள். அவன் கொடுத்த அந்த பொக்கேவை
பிரித்தாள்.. அழகிய ரோஜாக்கள் அடங்கிய கொத்து. நறுமணம் மூக்கைத் துளைத்தது. இடையில் ஒரு கடிதம்
சொறுகப்பட்டிருந்தது.

"அன்பு லட்சுவுக்கு..
உனக்கு நான் எழுதும் கடைசி காதல் கடிதம். என்னோடு வாழ்ந்த நாட்களில் நான் சொர்க்கத்தில்தான் இருந்தேன்
என்பதை நீ அறிவாய்.. நீ எங்கு இருந்தாய் என்பதை நான் அறியேன். காதல் ஒரு வரப்பிரசாதம், அதில் நீ ஒரு சாதம்
என்று அடிக்கடி என்னிடம் சொல்வாய். உண்டு மயங்கிய என்னை நீ ஜீரணக்கோளாறு என்று ஒதுக்கலாமா? உனக்காக
நான் எழுதிய கடிதம் கூட அழுகிறதைப் பார் லட்சு. யுவா உனக்காக பிராத்தனை செய்கிறான். அவனுக்கு அறிவு எட்டும்
காலம் வெகுதூரமில்லை/ குழந்தையை முன்னிட்டாவது நீ கைசேர்வாய் என்று நினைத்தேன். ஆனால் உன் ஆன்மாவில்
நான் மிகப்பெரும் துரோகி ஆகிவிட்டேன்.
யுவாவை உன்னிடம் விட்டபிறகு நான் அமெரிக்கா செல்ல இருக்கிறேன். இங்கிருந்தால் உன் ஞாபகத்தில் நான் இறந்தே
போவேன். எனக்கு வாழ ஆசை உண்டு// இறப்பென்றால் அது உன் மடியில்தான். உனக்கு ஞாபகம் இருக்கிறதா?
இரண்டு வருடங்களுக்கு முன் ஒரு மகளிர்தினத்தன்று எனக்கு கொடுத்த முத்தம்... உன்னிடமிருந்து நான் வாங்கிய
கடைசி முத்தம். அன்றைய நிகழ்வுகளை நினைத்துப்பார். உன் கணவன் என்றாவது தவறாக நடந்திருக்கமுடியுமா?
பெண்கள் மேல் எவ்வளவு மரியாதை வைத்திருக்கிறீர்கள் என்று பெருமை பொங்க சொன்னவள் நீ!
என்ன சொன்னாலும் உன் பாறை மனது கரையாது. உன் நினைவுகளாலும் உன்னை மட்டுமல்ல நான் நேசித்த இந்த
நாட்டையே பிரியப் போகிறேன்..
யுவாவை நல்லபடியாக படிக்கவை.. அவனும் நல்ல நிலைக்கு வரவேண்டும்.. நீ ஒத்துக்கொள்வாயோ மாட்டாயோ யுவாவின்
பெயரில் பேங்கில் பணம் போட்டிருக்கிறேன். அவன் படிப்பு செலவுக்கு உதவும்..

மற்றது...........

கண்ணீர் தவிர வேறெதுவும் மிச்சமில்லை..

உன் அன்பு முன்னாள் கணவன் (துரதிர்ஸ்டசாலி)

விஷாக்.

கடிதம் படித்ததும் கண்களில் வியர்வைகள் சொட்டியது. ஏற்கனவே அழுதவள் தற்போது இன்னும் அழுதாள்.. கண்களைத்
துடைத்துவிட்டு போன் செய்யப்போனாள்.. அவளின் பார்வை அந்த எழுத்துக்களின் மேலேதான் இருந்தது.
அவள் வயிறு மீண்டும் ஒரு சிசுவுக்காக ஏங்கிய காலம் மீண்டும் வந்துவிட்டது போலும்.. காலியாக்கப்பட்ட இதயம்
மீண்டும் நிரப்பப்படும் என்று நம்பிக்கையில் போன் செய்தாள்.. காலண்டரைப் பார்த்தாள். மார்ச் 8 மகளிர்தினம். மீண்டும்
ஒருமுறை அவனுக்கு முத்தமிட மனம் துடித்தது.

அவன் ஹலோ என்றான். அக்கணமே அவள் உயிர் அவனோடு கலந்துவிட்டது..

சிறு வயதில் தெலுகு சூழலில் நான் வளர்ந்தாலும் தமிழ் பாடல்கள்தான் கேட்டறிந்தேன்... தெலுகு பாடல்கள் அப்போது
ஈரோட்டில் விற்கப்பட்டனவா என்பதை விட, எனக்கும் அவ்வளவாக புரியாது// தமிழ் பாடல்களில் உண்மையிலேயே
நான் மயங்கியது இளையராஜாவின் இன்னிசையில்தான். ஒவ்வொருமுறையும் கேட்கும்போதெல்லாம் இனிப்பு ஊறும் என்
நாக்கில். அதிலும் மோகன் படப் பாடல்கள் எங்கு ஒலித்தாலும் நின்று கேட்பேன்.. அந்த அளவுக்கு பைத்தியம்.. இதில்
உச்சம் " வா வெண்ணிலா! உன்னைத் தானே" என்ற பாடல். மெய்மறந்து நிற்கிறான் என்று சொல்வார்களே!!! அந்த
நிலைக்கு வந்துவிட்டேன்./ அடுத்ததாக ரகுமான்.. ரொம்பவும் நான் ரசித்த, ரசிக்கும் பாடல் "ரோஜா ரோஜா-
காதலர்தினம் படப்பாடல் (அதற்கு காரணமிருக்கிறது.. பிறகு டைரியில் சொல்கிறேன்.) தற்போதைய சில பாடல்கள்
மட்டுமே நான் முணுமுணுக்கிறேன். பெரும்பாலும் தமிழ்பாடல்கள் கேட்கும் வழக்கமே போய்விட்டது.. பழைய பாடல்கள்
என்றாவது கேட்பேன். இல்லையென்றால் நம்ம இளையராஜா அல்லது எப்போவாவது இசைப்புயல்....

ஆங்கிலப்பாடலுடன்:

சிறு வயதிலேயே மைக்கேல் ஜாக்ஸன் பாடல்கள் என்றால் உயிர். அனைத்து பாடல்களும் அடங்கிய இரு VCD நான்
வாங்கினேன். அதைப் போட்டு போட்டு பிளேயரே தேய்ந்திருக்கும். வீடியோ பாடல்கள் அனைத்தும் பார்த்தாகிவிட்டது.
பின் ஆடியோ பாடல்கள் விலைக்கு வாங்கி கேட்டேன்.. அனைத்திலும் சொக்கிப் போனேன்.. எனக்கு மிகவும் பிடித்த எம்
ஜெ பாடல் : Billy Jean, Beat it, Thiriller மற்றும் சொல்லிக்கொண்டே போகலாம்.. திரில்லர் மிக அருமையான பாடல்...
பக்கா டேன்ஸ்.. மைக் தன் வாழ்க்கையை மிக ஆடம்பரம் பண்ணியே அழிந்துகொண்டு இருக்கிறார்.. மிக வேதனையான
செயல்..

மைக் கிற்கு பின் பிரிட்னி, தேன் குரல் என்பதை நான் கேட்டது அவளுடைய குரலில்தான். அவளுடன் நான் கேட்ட
முதல் பாடலே தூள்// baby one more time. ஒன் மோர் டைம் கேட்க வைக்கும் குரல்,... ஆனால் அவளுடைய
பிரபலமான சில பாடல்கள் மட்டுமே தான் கேட்டேன்.. மெய் சிலிர்த்தேன்.. அப்போதுதான் மற்ற பாப் பாடகர்கள் மீது
ஒரு கவனம் வந்தது... அதற்கு முழுமுதற் காரணம். V Tv, VH1. இவளுடைய The beat goes on, I am Slave, My
prerogative, கடைசியாக, Toxic... போன்ற சில பாடல்கள் மட்டுமே பிடித்தது... அதற்கு பின் இன்று வரை நான் இவள்
பாடல்கள் கேட்பதில்லை.. ஏனோ பிடிக்கவில்லை..

பிரிட்னிக்கு அடுத்து நான் மிகவும் ரசித்த பாடக பாடகிகள் : Jlo, Enrique, Kylie,

இதில் ஜெலோ வின் All I have பாடலை இன்று முனகினாலும் போன முறை கிரிக்கெட் உலகக் கோப்பை ஞாபகம்
வரும்.. அந்த சமயத்தில் வெளியான பாடல், பின் Jenny From The Block, Get Right போன்ற பாடல்கள் மிக அருமை..

Enrique மிகக் குறிப்பிடவேண்டிய மனிதர்.. நான் விழுந்துவிட்ட பாடல் Escape. அடாடா!! மிக அருமையான பாடல்..
நேர்த்தியான காட்சியமைப்பு!! அதிலும் அந்த பெண்..... (அவள் ஒரு பிரபலம்... மிகப் பிரபலம் உங்களுக்குத் தெரிய
வாய்ப்பிருக்கிறது.. யாரெனச் சொல்லுங்கள் பார்போம்) காட்சிகளில் சில ஆபாச அமைப்பு, அதை விட்டால் மற்ற
அனைத்தும் மிக அருமை.. மோட்டார் வண்டியில் போய்கொண்டு இருக்கும்போதே அப்படியே பாடகனாகி மேடையில்
பாடுவதாக எடுக்கப்பட்ட கிராபிக்ஸ் மிக நேர்த்தி... இவருடைய Escape ஆல்பத்தின் எல்லா பாடல்களும் டாப்!!!
குறிப்பாக Escape, Love to see you Cry, Hero. Dont turn off the light. போன்றவை டாப்கிளாஸ்...

kylie.... அழகான கிழவி.. அவளை நான் கண்ட முதல் பாடலிலேயே சொக்கிப் போனேன்... பாப் உலகில் ஒரு கிழவியும்
பாடுகிறாள் என்றாலும் ஏற்றுக்கொள்கிறார்கள்.. குழந்தைத் தனமான குரல் அவளுக்கு... இவளுடைய Fever ஆல்பப்
பாடலை இன்றுவரையிலும் கேட்கிறேன்... குறிப்பாக சொல்லவேண்டிய பாடல்கள் : In your eyes, Can't get out of my
head, Love at firsht sight, Come into my world... மற்றும் more more... In your eyes யாருக்கும் பிடிக்கும்படியான
இசையமைப்பு! பின்பக்க கிராபிக்ஸ் அமைப்பு... அதேபோல்தான் இரண்டாவது பாடலும்... Love at First sight பாடல்
மிக நேர்த்தி... அழகான கிராபிக்ஸ் அமைப்பு... ஒரே ஸ்டுடியோவில் எடுக்கப்பட்டு பின்பக்கம் நேர்த்தி
செய்திருக்கிறார்கள்.. நம்மவர்கள் செய்யும்படியானதுதான்.. ஐடியா கிடைகாதே!! Come into my world பாடல்
சொல்லும்படியான பாடல்.. அந்த பாடலில் பின்பக்க நிகழ்வுகள் எல்லாம் ஒரே மாதிரி கைலி மட்டும் ஒரு தெருவை
சுற்றி வருகிறாள்.. இந்த பாடலில் நான்கு கைலிகள். முதல் கைலி விட்டுச் சென்ற ஒரு பையை இரண்டாவது கைலி
எடுத்துச் செல்லுவாள்.. இப்படியாக நான்குபேரும் பாடுவார்கள்.. இடையிடையே காட்சி வெட்டு இருக்காது.. வீடியோ
உள்ளது அனுப்புகிறேன் பாருங்கள்.. கிராபிக்ஸில் மிக சவாலான விசயம்தான் நம்மவர்களுக்கு..

அடுத்து Shakira..

நான் முதன்முதலாக ஒரிஜினல் கேசட் வாங்கிய ஆல்பம் இவளுடையதுதான். Laundry Service.
லத்தீன் பாடல்கள் சில இதில் அடக்கம்.. இவளின் நடன அசைவு அப்பப்பா! சொல்ல வார்த்தைகள் இல்லை.. Whenever,
wherever, Objection Tango, te dejo madrid, under neath your clothes, the one, que me quedes tu போன்ற பல
பாடல்கள் மிக அருமை... சமீபத்தில் வெளிவந்த Fijaci�n Oral (Vol.1), Oral Fixation (Vol.2 ) அனைத்துபாடல்களும் மிக
அருமை.. ஷகிரா உண்மையில் அழகும் அறிவும் ஆட்டமும் நிறைந்த பெண்மனி... கண்மனி

Shania Twain. சில பாடல்கள் கேட்டிருக்கிறேன்.. கேட்ட அனைத்து மிக டாப்//
I'm gonna getcha good! Up, Ka ching, Forever and for always... அனைத்தும் கேட்கும்படியான பாடல்கள் அவள்
கிழவி என்றாலும் குரலில் குமரி.... வாய்பிருந்தால் வீடியோ இணைக்கிறேன்.

அப்பறம் Nelly, Nelly Furtado, Stefani, Evanesence, Celin Dion, Eminem, Shaggi, Avril, 50 cent இப்படி பட்டியல்
நீண்டு கொண்டே போகும்.... அனைத்து பாடல்களும் மிக அருமை..

Kelly Clarkson: போன வருடம் கிராமி வாங்கிய பெண்மனி... மயங்கி மயங்கி பாடல்கள் கேட்டு இருக்கிறேன்.
(இவளுடைய ஒரு பாடலைத்தான் வித்தியாசமாக ஒரு பாடல் விமர்சனம் என்ற பெயரில் திரி போட்டு இருக்கிறேன்.)
அர்த்தம் மிகுந்த பாடல்கள். ஆழமான பாடல்கள்.. நேரம் அமைந்தால் மற்ற பாடல்களுக்கும் விமர்சனம் எழுதுகிறேன்..
என் வாழ்வில் மறக்க முடியா பாப் பெண்மனி. Break away, behind these hazel eyes, Since you been gone, becaus of you போன்றவை டாப்

Maria Carey... சலித்துப் போகுமளவு இவள் பாடல்கள் கேட்டு இருக்கிறேன். We Belong together என்ற பாடல் என்னை
ஒரு கவிதை எழுதத் தூண்டி இருக்கிறதென்றால் பார்த்துக்கொள்ளுங்கள்.. (தெரிகிறதா ஏமாற்றம்?) உடையா குரல்
கொண்ட பெரியமனசுக் காரி.. அழகானவள்.

Beyonce பிரிட்னிக்கு போட்டி என்கிறார்கள். முதன்முதலாக இவளைப் பார்த்தது Destiny;s Child குருப்பில்தான். பின்
அடிமையாகிவிட்டேன்./. இவளுடைய குரலுக்கு... அழகானவள்.. பிரிட்னியெல்லாம் வெறும் தூசுதான்... இவள் ஒரு
புதையல். baby boy, crazi in love, Naughty girl கடைசியாக வந்த ஆல்பமான Bday யிலிருந்து Dejavu, irriplaceble, ring the alarm போன்றவை டாப்

குரூப்பாக பாடும் பாடல்களில் Bep (black eyed peas) ரொம்ப பிடிக்கும்.. அதில் Fergie எனக்கு மிகப் பிடித்தமானவள்.

Dido.. இவளுடைய ஒரு பாடல் என்னை கவிதை எழுதத் தூண்டியது (நன்றி காதலனே!) அனைத்து அர்த்தமுள்ள
ஆழமான பாடல்கள்.. life for rent, White Flag, Thank you.... போன்றவை சூப்பர்..

இன்னுமிருக்கிறார்கள்... இத்துடன் முடித்துக்கொள்கிறேன். ரொம்ப படித்தால் சலிப்பாக போய்விடும்.. நினைவு

வரும்போது மீண்டும் தருகிறேன்..

ஆவியைக் காதலித்தாலும்
அவள் மறையும் நிமிடங்கள்
வாழ்க்கையின் ரணக்கீறல்கள்
அவளோடு வாழ்ந்த காலத்தில்
பேசிய பேச்சுக்கள் ஏராளம்/
ஒரு உயிர் அடங்கும்போது
நினைவுகள் ஏராளமாய் வந்து
கதவைத் தட்டுமல்லவா?

கண்முன் மறைகிறாள் குழலி...
அது பிறருக்குத் தெரியவில்லை.
பிடிபட்ட கதிரவன் கதறினான்..
போகாதே என்று இதயம் வெடிக்க
துடிதுடித்துப் போனான்..
காதலின் உச்சமாக அந்த உடலுக்கு
முன்னே நின்றுகொண்டு
முத்தமிட்டான் அவள் இதழ் நோக்கி.....
அச்சமயம் ஒரு அதிசயம்.....

காதல் எவ்வளவு வலிமையானது?
ஒரு முத்தத்தில் பிரிந்த காதல் உண்டு
முத்தத்தில் சேர்ந்த காதல் உண்டு..
ஆனால்
முத்தத்தாலே உயிர்வந்த காதலுண்டா?

இறந்து போன குழலி
நினைவுகளின் வலிமையால்
மீண்டும் உயிர் பெற்றாள்..
அவளின் கோமா நிலையால்
நிற்கக் கூட இல்லாத நிலை..
சுற்றி நிற்கும் காவல் கூட்டத்தையும்
மருத்துவ உடை அணிந்து நிற்கும்
மருத்துவர்களையும்
ஏனைய சந்திப்பாளர்களையும்
வித்தியாசமாக நோட்டமிட்டாள்..
அவளுக்கு எல்லாமே புதிதாகத் தோன்றியது..
அவள் நினைவுகளின் காதலன்
கதிரவன் உட்பட....

அவள் உயிர் பிழைத்த சந்தோசத்தில்
மனையே மகிழ்ச்சியில் திளைக்க,
மனம் மட்டும் சோகமாய் திரிந்தான்..

உயிர் உடலோடு
சேர்ந்தால்தானே மனிதன்?
முயற்சிக்கலாமே என்று
படுத்திருந்த உடலோடு
ஆவியான இவள் படுத்தாள்..
ஆனால் எதுவும் நடக்கவில்லை..
கைகளை ஆட்டிப் பார்த்தாள்.
தலையை நீட்டிப் பார்த்தாள்.
ம்ஹீம்...
அச்சமயம் பார்த்து
தலைமை மருத்துவர் வந்து சேர்ந்தார்..
கோமாவில் படுத்திருக்கும் உடலை
எடுத்து சென்றுவிடுமாறு
பூங்குழலியின் அக்காவிடம் சொன்னார்,,,
அனைத்தையும் கேட்டறிந்தாள்
அவர்களுக்கு மிக
அருகே நின்றுகொண்டே...

மெல்ல அவனோடு சோர்ந்தவாறு
வீடு சேர்ந்தாள்...

கவிதை சேர்க்கும் மொட்டை மாடியில்
எண்ணங்களை உலவ விட்டார்கள்,,
எண்ணங்கள் காதலித்தால்
இவர்கள் காதலர்கள் தாம்..
ஆவியுடன் காதலா?
எண்ணலாம்...
சொல்லியிருக்கிறார்களே
"காதலுக்கு கண்ணில்லை,
காதில்லை
மூக்கில்லை
முழியில்லை "என்று...

கதிரவன் ஒரு முடிவு செய்தான்
உடலைத் திருடி வந்துவிட....
என்றாவது ஓர்நாள் உயிர் இணையுமல்லவா,,

நண்பன் உதவியால்
மெல்ல மருத்துவமனை சென்றான்
நாசியைப் பிடுங்கும்
நாற்றம் கமழும் இடம் இது..
மூக்கைப் பிடித்தவாறே
ஒரு பூனை போல சென்றார்கள்..
இது என்ன மடமா? சத்திரமா?
மருத்துவமனை..
காவலின்றி போகுமா?
கடத்தலில் புதியவன் என்பதால்
கதிரவன் தவறிழைத்துவிட்டான்.
காவல் காரர்கள் சுற்றி வளைத்தார்கள்..
இருப்பினும் அவள் உடல் அடங்கிய
சக்கர மெத்தையை உசுப்பி
அங்கிருந்து அகன்றான்.
ஆனால் பிடிபட்டான்...

கோமாவிலிருந்த குழலி
இந்த கூச்சல் குழப்பங்களுக்கிடையில்
இறந்தே போனாள்...
நினைவுகளின் இறப்பால்
உடலைவிட்டு பிரிந்த நினைவுகள்
உடல் போனது நினைவுகளும் போயிற்று..

ஒருவன் அடிபட்டுக் கிடந்தான்...
மருத்துவர்கள் எவருமில்லை..
ஒருவேளை இருந்தாலும்
உதவுவார்களோ?
மானங்கெட்ட மனிதர்கள் சிலர்
தண்ணீர் கொடுக்கவும் தயங்குவார்கள்.
குழலியினால் மற்றவர்கள் கண்களுக்கு
காட்சி தரவும் முடியாது..
பொருள்களைத் தொடவும் முடியாது.
கதிரவனைத் தூண்டினாள்..
முதலில்
முதலுதவி செய்ய....

ஒன்றுமே அறியாத அவன்
அவள் சொல்படி
ஒவ்வொன்றாய் செய்தான்.
விபரங்களை அவளிடம் கேட்டறிந்தான்.
மற்றவர்களின் கண்ணுக்கு
அவள் தெரியாள்.
ஆக இவன் பேசியது
அவர்களுக்கு விசித்திரமாக இருந்தது...
முதலுதவியில் அவன் உயிர்பெற்றான்.
அச்சமயந்தான் பூங்குழலி அறிந்துகொண்டாள்
தானொரு மருத்துவச்சி என்று...


ஞாபங்களின் இழப்பால்
ஞானம் போய்விட்டதே!
கதிரவனின் துணையால்
தூண்டு பெற்றிருக்கிறாள்
அழகிய கிழத்தி.
விழிகளில் யோஜனை செய்தாள்
அவள் பணி செய்த மனைக்குச்
சென்று விசாரிக்க முடிவெய்தாள்..

உடனே விரைந்து சென்றார்கள்
இருவரும்
ஒரு மனதின் வேகத்தைப் போல..
தன் இறப்புக்கு முந்தைய வாழ்க்கை
தன் பிறப்புக்கு பிந்தைய வாழ்க்கை
எவ்விதமிருந்திருக்கும்?
அறிந்து கொள்ள ஆவலுற்றாள்..

அங்கே வரவேற்பரையில்........

மருத்துவமனை என்றால்,
நாற்றம் வீசவேண்டுமா?
நோயாளிகளின் அழுகிய வாசனையும்
பணம் திருடும் மருத்துவர்களின்
மெல்லிய பேச்சும்
மருத்துவச்சிகளின் அவசர ஓட்டமும்
தான் இறப்பதை இன்னும் அறியாது
அவசரப் பிரிவில் படுத்திருக்கும்
இருதய நோயாளிகளும்
மருத்துவமனையை அடையாளம் காட்டின,,
வரவேற்பறைப் பெண், ஓவியா
வாய் திறக்க கஷ்டப் படுவாள் போலும்
பூங்குழலியைப் பற்றி கதிரவன் விசாரித்தான்.
பூங்குழலியைத் தன்னருகே வைத்துக்கொண்டே...
என்னே ஒரு உலகம்/? விந்தை?
அருகிலே அவள்...
முகவரி கேட்கிறான் வேறொருவளிடம்//

ஓவியா, தேன்மொழியைக் காட்டுகிறாள்.
தேன்மொழி, பூங்குழலிக்கு உற்ற நண்பி.

கதிர், மேல் மாடி சென்றான்.
தேன்மொழியைச் சந்தித்தான்.
விசாரித்தான்
அப்போது.........

தேன்மொழி சொன்னாள்,
" பூங்குழலி இறக்கவில்லை..
மாறாக அவள் நினைவுகள் இறந்துபோனது.
கோமாவில் இருக்கிறாள். "
குழலிக்கு புரிந்து போனது..
மெல்ல அவள் படுத்திருந்த அறைக்கு
அவளே சென்றாள்...

இந்த வாக்கியம் பார்த்தீர்களா?
இனிமையாக
இருக்கிறதல்லவா?

இனிமையில்லாது போனாள்
இவள்.

குழலியின் உடல் வெறும் ஜடமாய்
உயிர் மட்டும் உலாவிக் கொண்டிருக்கிறது
கதிரவன் கண்களுக்குத் தெரிந்தவாறு..

கலங்கிப்போயிருந்த
கதிரவனுக்கு
கண்களாலேயே மன்னிப்பு கேட்டாள்..
கதிரவன் தண்சுடர்..
ஒரு பெண், அதிலும்
அழகிய பெண், அதிலும்
இறந்து போன பெண், அதிலும்
கலங்கிய விழிகளோடு வந்தால்,
கல்லும் கரையாதா?

குழலியின் நண்பனாகிப் போனான்
கதிரவன்..

அவளைப் பற்றி
அக்கம் பக்கம் விசாரித்தான்...
(குழலி வசித்த வீட்டில் அல்லவா
கதிரவன் இடம் பிடித்திருக்கிறான்....)
விடைகள் இல்லை.
கூடவே அவளும் வந்தாள்..
கதிரவன் கண்களுக்கு மட்டும்
தெரியும் வண்ணம்........

குழலியின் நண்பியான
தேன்மொழி இல்லத்தை
இறந்த காரணத்தினால்
மறந்து போனாள்.
சற்று விசாரிக்கையில்
தெரிந்து கொண்டார்கள் இல்லத்தை...
ஆனால் அங்கே அவளில்லை..
அதற்கு எதிரே அவள்
குடி மாறியதைப் பாராமல்
மெளனமாக கலைந்து சென்றார்கள்
ஆவியும் பாவியும்....

மெல்ல நாட்கள் கரைந்தன,
ஆதவனின் ஒவ்வொரு எழுச்சியிலும்
நாட்கள் நகர்ந்து கொண்டு
இறுதியில் இறந்துபோக வேண்டும்..
எழுச்சி மட்டும்
என்றும் வீழ்ச்சி இல்லை.

ஓர் நாள்...
கதிரவன் கைபிடித்து (?)
நகர் வலம் வந்தாள் பூங்குழலி..
பூங்காவில் விளையாடும் சிறு குழந்தைகள்
சர்க்கஸில் சறுக்கும் பிஞ்சுகள்
அதனை ஆவலோடு பார்க்கும்
மற்றைய பிள்ளைகளுக்கு மத்தியில்
முக மலர்ச்சியாக
பூங்காவின் வழி
ஒரு ஓட்டலுக்குள் சென்றார்கள்,,
அங்கே அச்சமயம்.....

குளத்துப் படிகளில் மண்டியிட்டு
நீ அள்ளி வீசிய தண்ணீரின்
தெறிப்பை பார்த்து மகிழுவேன்.
குளத்து மீன்கள் வெட்கலாம்
நான் இரைத்த பொரிகளை தின்றுவிட்டு...

கொலுசாணியை சரிபார்க்க
முதல்படியில் நீர் நனைய
கால் பரப்புவாய்.
வெட்கி ஓடும் நீரைக் குடிக்க
அந்த வெட்கமில்லா மீன்கள்
தலைதெறிக்க ஓடும்..

பொரிகளுக்கு ஏங்கிய மீன்கள்
நீ விரித்த
பொறிகளுக்கு மாட்டியது
ஆச்சரியமல்ல...

உன் நனைந்த ஆடைகளைப்
பார்த்து ஏக்கப் பெருமூச்சு விட்டவாறு
சுவாசத்தைப் பருகுவேன்.
பாவாடையை முறுக்கி விட்டு
நான் கவனிக்கிறேனா என்று
சிரிப்பாய் வெட்கம் வழிய.........

உன் தோளணைத்து குளக்கரையில்
அமர்ந்திருப்போம்,
துணிகள் ஆதவனின் கதிர்களால்
உலரும் வரை...
நீயும் நினைவுகளோடு பேசுவாய்
அவன் கதிர் வீசுவதை நிறுத்திவிட்டு
உன்னுடன் உளரும் வரை...

எழுந்தோம்; நடந்தோம்.

ஆன்மீகம் குடிகொண்டிருக்கும்
ஒரு சிலையை வணங்குவதற்கு முன்
ஒரு பூக்கடைக்குப் புறப்படுவோம்
ஒப்பனைகள் புரிய..

வண்டுகள் மொய்த்துக்கொண்டிருக்கும்
பூக்களில் எல்லாம் உன் வாசனை
உன் கூந்தல் சுற்றி இப்போது
வண்டுகளின் கூட்டங்கள்

உன் கூந்தலில் ஏறிவிட்டு
உதிறும் பூக்கள் எல்லாம்
உதிரம் கொட்டிக்கொண்டு செல்லும்
கூந்தல் ஏறிய பூக்களோ
கனத்துப்போய் ஏளனமாய் பார்க்கும்.

என் கரம் பிடித்தவாறு
ஒரு குழந்தையாக தவழ்ந்து வருவாய்.
தரிசன வரிசையில்..
உன் வியர்வைகளை
என் ரேகைகள் ருசிக்கும்
உன் ஈரத்தை என் மனம் ரசிக்கும்

இறுதியாக அந்த சிலை வந்ததும்
நான் வணங்குகிறேன் சிலை நோக்கி
நீ திரும்பி நிற்கிறாய் என்னை நோக்கி,,,

ஒரு தெய்வக் குடிலுக்குள்
உயிருள்ள என்னை
தெய்வமாக்குகிறாய்
நானோ உயிரற்ற ஒரு கல்லை
தெய்வமாக்கப் பார்க்கிறேன்..

அவள் மேஜைக்கு
இடையில் நின்று கொண்டிருந்தாள்.
அவளின் இடை
மேஜைக்கு மேலும்
கால்கள் கீழும்
இருந்தன....
விந்தை...
அவள் இறந்துபோனவள்.
அவள் ஒரு ஆவி...
அது அவளுக்கு விளங்கவில்லை...

சிறிது நாட்கள் நகர்ந்தது,.
அவள் அவனோடே வசித்தலானாள்
அவனின் செயல்களுக்கு
இடைமறித்தாள்...
நன்றாக படியுங்கள்
இடைமறித்தாள்.

தொல்லை காட்சி பார்க்கையில்
தொல்லை கொடுப்பாள்
பாட்டு என்ற பெயரில்
அறை அதிர அலறுவாள்
அழகிய முகம்தான்
அவளுக்கு என்றாளும்
அவதியுறும் செயலால்
அழுகிய முகமாய் தெரியலானாள்
அவனுக்கு...

முடிவு செய்தான்...

சாமியார்களை வரவைத்தான்..
பேயோட்டும் சாமியார்கள்- வெறும்
நாயோட்டும் சாமியார்கள்
அவளுக்கு அருகிலே இருந்தும்
ஓடல் நடைபெறவில்லை.
அவளும் ஓட்டமெடுக்கவில்லை.
மாறாக,
ஏளனமாக பார்வையிட்டாள் குழலி...
பேயோட்டுபவனுக்கு குழலி தெரியவில்லை..
ஆம்... கதிரவன் கண்களுக்கு மட்டுமே
விருந்தாக வந்திருக்கிறாள்.
மற்ற சுடர்களுக்கு வெறும் காற்றுதான்..
அற்புதம் என்பதா இதை?

ஆவியிடம் பேசுபவர்கள்,
சூனியம் செய்பவர்கள்
சாமியார்கள்
இன்னபிற இத்யாதிகள்
எல்லோரையும் வரவைத்து
ஓட்டப் பார்த்தான் குழலியை..
அவனருகேயே அமர்ந்து கொண்டு
அனைத்தையும் கவனித்தாள்
அஞ்ஞானத்தோடு....

பணத்தைக் கொடுத்து
ஏமாற்றம் வாங்கினான்..

குழலி மென்மையானவள்
மருத்துவச்சிகளின் ஆரோக்கிய குணம்
அழகிய விழிகளும்
சோடா குண்டுகள் போல விழிகளும்
நடுப்புற ரோஜா போல நுதல்களும்
பெற்ற பேரழகி....
அவள் க்ஷணநேரம் யோசித்தாள்...
துன்பம் என்று மற்றவர்களுக்கு
கொடுப்பதை என்றாவது யோசித்திருப்போமா?
என்று கலங்கினாள்..
ஒரு முடிவும் எடுத்தாள்.....

Subscribe